-शेर्पा पाशाङ ग्याल्जेन लामा

स्यर्वी तम्ङे तङ यिकी
इश्वीलो ७००-११०० कि फर्ला पाली तङ संस्कृत ला ठिनि वोतु नङबी सङ्गे कि छ्यो टाकटुक  सम्बोटा यिकि  ला फेपि ताम्ङेला ग्युरु सिन गोमला फेकि लुङबा खुतुक खुतुकला दक्दक्पीकि तम्ङे लोउ मिरीक तिवि नङ्ला दक्पु स्यर्वा तिवि लोउ स्यर्वी ताम्ङे तिङ च्यीग यीन।
स्यर्वा तिवा ईश्वीलो १४८० ला खोरङ केउ लुङबा खाम नेसुर खोलीखोली ख्याने दासा पोनि फेपनी ईश्वीलो १५३० ला खङरी छ्यमूलोङमी दोङ स्यार खुम्बुला फेउकि लोक्यु नोक। स्यर्वा तिवा लेउ सिना गोमला खुम्बुला मि रङ मेतु तप्की खुम्बु ति स्यर्वि लुङबा यिन्दुला छ्य ज्यौ यिन्नोक।
इश्वीलो १५५३ न्या-ज्युङ स्यर्वा तिवा खुम्बु सुर स्योरुङ तङ लुङबा  यम्बाला लुङबा क्यानी फेउ तप्की थिङसङ स्यर्वा तिवा यम्बुर जोङ सोलु खुम्बु, वखल्ढुङ्गा, भोज्पुर, संखुवासभा, सुन्सरी, इलाम,  काठमाण्डौं, सिन्धुपाल्चोक, रामेछाप तङ दोलाखा ल तङ ग्यखर लुङ्बा दार्जीलीङ, सिक्कीम, तङ आसाम ल तङ छिग्या लुङ्बा युरोप तङ अमेरिका सक फेलुकि स्येर्वा तिवि लोउकि भोट-बर्मेली-समुह कि तम्ङे ति स्यर्वा टाकटुककि पिर्मी तम्ङे यीन।
दक्पि नङबी छ्यो तिवा टाकटुक सम्बोटा यिकी ल फेपि तम्ङे ल तिरङ ठिनी वोतु तप्की दक्पु स्यर्वा तिविसङ सम्बोटा यिकि तङ फेपि तम्ङे ति छ्यो कि यिकी तङ तम्ङे यीन सिनी चीनी ज्यौ यिन मीसी युल्की लाकातङ स्युङकि लाका ला सम्बोटा यिकि ठिकुकी लुङसु मिन्दुक।

स्यर्वी तम्ङे यर्के डो माथुवु थेन्दोक तिवा।
• यम्बुर् ला लो २४० सक देतुकि शाह ग्यल्वु तिवि रोङबि (खस) तम्ङे तिरङ ग्यल्खप कि तम्ङे जोउ तप्की मिरीक (जनजाति) कि लोउ तम्ङे तिवा तङ स्यर्वी तम्ङे यर्के मातङगु यिन।
• स्यर्वा तिवीकी दक्दक्पी युल्ला ज्याउकि गोन्दा तिवी नङ्ला सङ स्यर्वी तम्ङे ल यिकी मा-लप्नी फेपि तम्ङे ल रङ लोपु तप्की गोन्दी लप्टा तिवीसङ स्यर्वी तम्ङे यर्के तोङ मा-थुपु यिन।
• स्यर्वा लम तङ गेकेन तङ खेन्पो तिवी सङ फेपि तम्ङे ल वोतु पेज्य तिवा फेपि तम्ङे मेशेउ स्येर्वा तिवी सङ स्येउ तङ ह खोउ ख्यानि स्यर्वी तम्ङेला माग्युर्नी
फेपि तम्ङे ल रङ लोपु तप्की स्यर्वी तम्ङे यर्के डो मा-थुपु  यिन।
• स्यर्वा तिवा लाका ल्यामु छोलु ल लुङब यम्बला दासा क्यानि गलु तप्की युल्ला स्यर्वी तम्ङे लोउ मितिवा कोर्मु गलु यिन।

स्यर्वी तम्ङे यर्के तोङगु ल खङ खि गोकी ?
• दक्पी अङा तिवला स्यर्वी तम्ङे लोपु ला खङ्बा तम्ङे लोप्सी स्यर्वी तम्ङे ल   रङ लोपुकी लुङसु लोप गोकिवी।
• दक्पु स्येर्वा तिवा खनि ठेसिनङ खनि जोम्सिनङ यिन्जीग मिन्जीग स्यर्वी तम्ङे लोउ कि लुङसु ज्योक गोकिवी।
• दक्पी लामा तिवी सङ छ्यो नङसी स्येर्वा तेरिकि स्येउ तङ हखोउ ख्यानि स्यर्वी तम्ङेला छ्यो नङगुकि लुङसु देन गोकिवी।
• थन्द स्येर्वा तिवा फेपी तम्ङे तङ सम्बोटायिकी स्येउ सिना देवनागरी तङ ईङ्लीस स्येउ मि मङा वोतु तप्की दक्पी तम्ङे ति देवनागरी तङ ईङ्लीस रोमन यिकीला  ठिकुकी लुङसु देन गोकिवी।
• स्यर्वी तम्ङे मेस्येउ मि तङ दक्पि अङा तिवला स्यर्वी तम्ङे लोउला खक्छेला नेपाली-शेर्पा-शब्दकोष तङ ईङलीस-शेर्पा- डीक्स्नरी जो गोकिनोक।
• स्यर्वी तम्ङे थकछेमु जोप्ला स्यर्वी तम्ङेकी  थकयीक जो गोउ खकछेमु नोक।
• स्यर्वी तम्ङेला मेतु तम्ङे छीक तिवा छ्योकि कोर्की छीक यिन्सी फेपी तम्ङे नङ्लासुर, स्युङकि लाका तङ राजनितीकि कोर्की छीक यिन्सी रोङबी तम्ङे (नेपाली भाषा) नङलासुर तङ साईन्स तङ टेक्नोलोजी कोर्कि तंम्ङे छीक यिन्सी ईङलीस तम्ङे नङलासुर ङ्यानी ज्यक्सी लेमु गिते नोकिनोक।
• स्यर्वी तम्ङे थङदि खिरु, ल्यामु जोप तङ यर्के तोङगुला यम्बुर स्यर्वा चिछोग तङ लुङ्बा यम्बला वोतुकि शेर्पा किदुक तिवि गोमा ख्यानी स्यर्वी तम्ङे स्येउ मिखामु तिवा छोक्मी जोनि स्यर्वी तम्ङे यर्के तोङगु कि छोङदी च्यीग खकछेला जो गोउ कि ठोङगु यीन।
   टशि देलेक।।